Stephen Hawking

Stephen William Hawking (8 de januario 1942 — 14 de martio 2018) esseva un physico theoric, cosmologista, autor anglese e director de recerca al Centro de Cosmologia Theoric al Universitate de Cambridge al epocha de su decesso. Ille esseva le Professor lucasian de Mathematica del Universitate de Cambridge inter 1979 e 2009. Su travalios scientific comprende un collaboration con Roger Penrose super le theoremas gravitational del singularitates in le quadro del relativitate general e le prediction theoric que le foramines nigre emitte un radiation, sovente denominate le radiation de Hawking. Hawking esseva le prime scientista que disveloppava un theoria del cosmologia explicate per medio de un consiliation del theoria general del relativitate e del mechanica quantic. Ille esseva un defensor vigorose del interpretation multimundial del mechanica quantic. Hawking deveniva commercialmente successose con plure obras de scientia popular in que ille discute su proprie theorias e alsi le cosmologia in general. Su libro Un breve historia del tempore appareva pro un duration record de 237 septimanas in le lista del libros le plus vendite del periodico britannic The Sunday Times. Hawking esseva un Membro del Societate Royal, un membro pro le vita del Academia Pontifical de Scientias, e recipiente del Medalia Presidential del Libertate, le plus alte recompensa civil del Statos Unite. In 2002, Hawking esseva classificate numero 25 in le sondage del BBC del 100 Plus Grande Britannos. Hawking habeva un forma rar, precoce e de progression lente de maladia motoneuronal (tamben cognoscite como sclerosis lateral amyotrophic o maladia de Lou Gehrig) que progressivemente le paralysava durante decennios. Mesmo post haber devenite mute, ille poteva continuar communicar per medio de un apparato de generation de linguage, initialmente con le adjuta de un interruptor manual, e finalmente con un sol musculo del gena. Ille moriva le 14 de martio 2018 al etate de 76 annos. Como un actor, ille jocava le personage de ille ipse in quatro episodios del sitcom The Simpsons e septe del sitcom The Big Bang Theory,, e ille jocava un simulation holographic de ille ipse in un episodio del serie Star Trek: The Next Generation.